Reclamación de ADEGA sobre el acceso al listado de proyectos eólicos y sus declaraciones de impacto ambiental resuelta como estimatoria

ASUNTO: Resolución da Comisión da Transparencia de Galicia na reclamación presentada ao amparo do artigo 28 da Lei 1/2016, do 18 de xaneiro, de transparencia e bo goberno Vista a reclamación presentada por XXX, en representación da Asociación para a Defensa Ecolóxica de Galiza (ADEGA), mediante escrito do 26 de abril de 2023, e considerando os antecedentes e fundamentos xurídicos que se especifican a continuación, a Comisión da Transparencia na sesión celebrada o día 27 de xuño de 2023, adopta a seguinte resolución: ANTECEDENTES Primeiro. XXX, en representación da Asociación para a Defensa Ecolóxica de Galiza (ADEGA) presentou, mediante escrito con entrada no rexistro do Valedor do Pobo o 26 de abril de 2023, unha reclamación ao amparo do disposto no artigo 28 da Lei 1/2016, do 18 de xaneiro, de transparencia e bo goberno, contra a Resolución do 30 de marzo de 2023, da Dirección Xeral de Planificación Enerxética e Recursos Naturais, pola que se resolve a súa solicitude de acceso ao listado de proxectos eólicos tramitados pola Xunta de Galicia que obtiveran o permiso de acceso á rede con posterioridade ao 31 de decembro de 2017 e as datas concretas nas que obtiveron ese permiso e, no caso de non haber erro no reconto publicado na prensa, acceso ao listado de proxectos eólicos con declaración de impacto ambiental resolta, indicando se foi en sentido favorábel ou desfavorábel e relación dos que non a teñen resolta. A Asociación reclamante indicaba que solicitou o listado de proxectos eólicos tramitados pola Xunta de Galicia, que obtiveran o permiso de acceso á rede con posterioridade ao 31 de decembro de 2017, así como as datas concretas nas que obtiveron ese permiso e que se lles confirme se houbo un erro no reconto publicado na prensa, e en caso contrario, se remita o listado de proxectos eólicos con declaración de impacto ambiental (DIA) resolta, indicando se foi en sentido favorable ou desfavorable, así como a relación dos que non teñen resolta a declaración de impacto ambiental. A contestación da Dirección Xeral foi unha relación dos parques eólicos con DIA favorable e DÍA desfavorable, e que foron arquivados, sen darlle a información solicitada, na que se conclúe que é o que se lles pode informar ao respecto, sen que proceda a elaboración do listado solicitado ao ser precisa unha acción de reelaboración. Segundo. Con data do 2 de maio de 2023 déuselle traslado da documentación achegada polo reclamante á Vicepresidencia Segunda e Consellería de Presidencia, Xustiza e Deportes para que, en cumprimento da normativa de transparencia, achegase informe e copia completa e ordenada do expediente. Terceiro. Con data do 26 de maio de 2023 a Vicepresidencia Primeira e Consellería de Economía, Industria e Innovación contesta a petición remitindo o informe e o expediente instruído. Neste informe, en resumo, indícase que a Asociación solicitou o listado de proxectos eólicos tramitados pola Xunta de Galicia, que obtiveran o permiso de acceso á rede con posterioridade ao 31 de decembro de 2017, así como as datas concretas nas que obtiveron ese permiso, indicando os que teñan a DÍA resolta en sentido favorable ou desfavorable, así como a relación dos que non teñen resolta a declaración de impacto ambiental, e con data do 30 de marzo de 2023, ditouse resolución expresa. Indica a Consellería no seu informe que non existe o documento no que figure a información tal e como a que pide a solicitante (listado de proxectos eólicos tramitados pola Xunta de Galicia, que obtiveran o permiso de acceso á rede con posterioridade ao 31 de decembro de 2017, así como as datas concretas nas que obtiveron ese permiso), polo que a información que se facilitou foi en base aos contidos existentes. Considera que a información solicitada, precisaría dunha acción de reelaboración, polo que sería causa de inadmisión; aínda así, optouse en todo caso por facilitar a información que estaba dispoñible, sen facer unha inadmisión de toda a solicitude. Na resposta dada aos solicitantes, tras sinalar o número de parques con permiso de acceso e conexión obtido entre xaneiro de 2018 e o 25 de xuño 2020, e desglosar ese número entre arquivados, con DIA favorable, DIA desfavorable e os que non completaron o trámite da DIA, se lles informaba tamén sobre a posible orixe da discrepancia de datos por eles sinalada, indicándolles na resposta que existen, adicionalmente, 4 parques que obtiveron a DIA entre o 10/05/2017 e o 23/12/2020, e que non tiñan o fito do 25/01/2023 para a obtención da DIA, o que pode ser a orixe da discrepancia de 4 parques que existe entre o reconto de instalacións don DIA favorable feito e por esa entidade (81) e o que se informou na prensa (77). Indicase así mesmo que se ben a entidade solicitante amparou a súa petición de información na Lei 27/2006, de 18 de xullo, de acceso a información ambiental, o certo é que a información á que se solicitou acceso non cabe considerala como ambiental, xa que o que se piden son listados de proxectos eólicos tramitados con diferentes casuísticas. Conclúe o informe que a información tal e como é solicitada non existe, e esixiría unha elaboración ad hoc, xa que obrigaría a mesturar datos de diversas fontes e incluso incorporar manualmente datos relativos a obtención de permisos de acceso, que é un trámite alleo a esta administración, realizado polos promotores ante os xestores das redes de transporte e distribución. FUNDAMENTOS XURÍDICOS Primeiro. Competencia e normativa O artigo 24 da Lei 19/2013, do 9 de decembro, de transparencia, acceso á información pública e bo goberno, de carácter básico na súa práctica totalidade, establece que contra toda resolución expresa ou presunta en materia de acceso á información, poderá interpoñerse unha reclamación ante o Consejo de Transparencia y Buen Gobierno, con carácter potestativo e previa a súa impugnación en vía contencioso-administrativa. Esa mesma lei, na súa disposición adicional cuarta, establece que a resolución da reclamación prevista no artigo 24 corresponderá, nos supostos de resolucións ditadas polas Administracións das Comunidades autónomas e o seu sector público, e polas Entidades Locais comprendidas no seu ámbito territorial, ao órgano independente que determinen as Comunidades Autónomas. O artigo 28 da Lei 1/2016, do 18 de xaneiro, de transparencia e bo goberno, establece que contra toda resolución expresa ou presunta en materia de acceso á información pública, poderá interpoñerse unha reclamación ante o Valedor do Pobo, correspondendo á Comisión da Transparencia, de acordo co disposto no artigo 33, a resolución das devanditas reclamacións. Segundo. Procedemento aplicable O artigo 28.3 da citada Lei 1/2016 establece que o procedemento de reclamación axustarase ao previsto nos parágrafos 2, 3, e 4 do artigo 24 da Lei 19/2013, que establece que as reclamacións contra resolucións en materia de acceso á información, que ten carácter potestativo e previo á impugnación en vía contencioso-administrativa, axustarán a súa tramitación ao disposto na lexislación de procedemento administrativo común en materia de recursos. Terceiro. Dereito de acceso á información pública A Lei 1/2016, do 18 de xaneiro, recoñece no seu artigo 24 o dereito de todas as persoas a acceder á información pública, entendida esta como os contidos ou documentos, calquera que sexa o seu formato ou soporte, que consten en poder dalgún dos suxeitos incluídos no ámbito de aplicación desta lei e que fosen elaborados ou adquiridos en exercicio das súas funcións, do mesmo xeito que a definición contida no artigo 13 da Lei estatal 19/2013 que ten carácter básico. O concepto de información pública e o dereito de acceso á mesma configúranse de forma ampla tanto na normativa autonómica como na estatal. Os titulares do dereito son todas as persoas, sen que o solicitante estea obrigado a motivar a súa solicitude de acceso á información (art. 26.4 Lei 1/2016, do 18 de xaneiro). O obxecto da Lei 19/2013, é ampliar e reforzar a transparencia da actividade pública e regular e garantir o dereito de acceso a información relativa a aquela actividade (art. 1). No seu preámbulo sinala que a transparencia, o acceso á información pública e as normas de bo goberno deben ser os eixos fundamentais de toda acción política e só cando a acción dos responsables públicos sométese a escrutinio, cando os cidadáns poden coñecer como se toman as decisións que lles afectan, como se manexan os fondos públicos ou baixo que criterios actúan as nosas institucións pódese falar do inicio dun proceso no que os poderes públicos comezan a responder a unha sociedade que é crítica, esixente e que demanda participación dos poderes públicos. Pola súa banda, a Lei galega 1/2016, sinala na súa Exposición de Motivos que a crecente esixencia cidadá de control público da actuación das administracións aconsella a aprobación dunha norma que supera os anteriores estándares e que se concreta nun texto legal que establece esixencias engadidas de transparencia e acceso á información pública. Cuarto. Prazo para a interposición do recurso O artigo 28.3 da Lei 1/2016, establece que o procedemento das reclamacións fronte ás resolucións en materia de acceso á información pública axustarase ao previsto no artigo 24 da Lei 19/2013. O artigo 24 da Lei 19/2013 establece que fronte a toda resolución expresa ou presunta en materia de acceso a información poderá interpoñerse unha reclamación con carácter potestativo e previo á súa impugnación na vía contencioso-administrativa. Esta reclamación interpoñerase no prazo dun mes para contar desde o día seguinte ao da notificación do acto impugnado ou desde o día seguinte a aquel no que se produzan os efectos do silencio administrativo. De acordo co informe remitido pola Dirección Xeral de Planificación Enerxética e Recursos Naturais a resolución ditouse con data do 30 de marzo de 2023, notificouse o 31 do mesmo mes e foi aceptada pola Asociación o 3 de abril de 2023, tendo presentada a Asociación a súa reclamación o 26 de abril de 2023, polo que debe ser admitida por estar presentada en prazo. Quinto.- Análise do expediente A Asociación reclamante solicitou acceso ao listado de proxectos eólicos tramitados pola Xunta de Galicia que obtiveran o permiso de acceso á rede con posterioridade a unha data, coas datas concretas nas que obtiveron ese permiso, os que teñen declaración de impacto ambiental resolto, indicando se foi en sentido favorábel ou desfavorábel e relación dos que non a teñen resolta. A Consellería resolveu a dita solicitude, indicando que obtiveron permiso de acceso e conexión entre o 1 de xaneiro de 2018 e o 25 de xuño de 2020, con fito para a obtención da DIA favorable 120 parques, dos que 5 Foron arquivados, 77 Obtiveron DIA favorable, 38 obtiveron DIA desfavorable e 20 non completaron o trámite de DÍA, e que existen adicionalmente, 4 parques que obtiveron a DIA entre o 10/05/2017 e o 23/12/2020, e que non tiñan o fito do 25/01/2023 para a obtención da DIA, o que pode ser a orixe da discrepancia de 4 parques que existe entre o reconto de instalacións con DIA favorable feito e por esa entidade e o que se informou na prensa. A resolución indica que é o que se lle pode informar ao respecto, sen que proceda a elaboración do listado solicitado ao ser precisa unha acción de reelaboración. O artigo 18.1 Lei 19/2013, establece diversas causas de inadmisión das solicitudes de acceso á información pública, entre as que se atopan as relativas a información para cuxa divulgación sexa necesaria unha acción previa de reelaboración. Como establece o Tribunal Supremo en sentenza 670/2022, do 2 de xuño, continuando a súa a liña xurisprudencial (entre outras sentenza do 16 de outubro de 2017, recurso 75/2017), a aplicabilidade desta causa de inadmisión , como de calquera outra causa, debe tomar como premisa a formulación ampla e expansiva coa que aparece configurado o dereito de acceso á información na Lei 19/2013, que impón unha interpretación estrita, cando non restritiva da inadmisión das solicitudes de información, na que o dereito de acceso á información soamente debe verse limitado naqueles casos en que así sexa necesario pola propia natureza da información -derivado do disposto na Constitución Española- ou pola súa entrada en conflito con outros intereses protexidos. Esa formulación ampla no recoñecemento e na regulación legal do dereito de acceso á información obriga a interpretar de forma estrita, cando non restritiva, tanto as limitacións a ese dereito que se contemplan no artigo 14.1 da Lei 19/2013 como as causas de inadmisión de solicitudes de información que aparecen enumeradas no artigo 18.1, sen que caiba aceptar limitacións que supoñan un menoscabo inxustificado e desproporcionado do dereito de acceso á información. Indica o Tribunal Supremo que a causa de inadmisión das solicitudes de información non opera cando quen invoca tal causa de inadmisión non xustifique de maneira clara e suficiente que resulte necesario ese tratamento previo ou reelaboración da información. Debido á severa consecuencia de inadmisión a trámite da solicitude que se anuda á súa concorrencia, é esixible que a acción previa de reelaboración presente una certa complexidade, polo que a subministración de información pública, a quen exercitou o seu dereito ao acceso, pode comprender unha certa reelaboración, tendo en conta os documentos ou os datos existentes no órgano administrativo, sen que esta reelaboración básica ou xeral, non sempre poida integrar, en calquera caso, a causa de inadmisión prevista no artigo 18.1.c), polo que precisa que tales datos e documentos teña un carácter complexo. No presente caso, a resolución pola que se resolve a solicitude de acceso pola Dirección Xeral, permite deducir que o referido órgano directivo posúe a totalidade da información solicitada, xa que indica o número de parques que obtiveron permiso de acceso e conexión entre as datas solicitadas, os que foron arquivados, os que obtiveron DIA favorable, os que obtiveron DIA desfavorable e os que non completaron o trámite de DÍA. De acordo coa normativa vixente en materia de transparencia e a xurisprudencia citada, non pode considerarse que para a elaboración do listado solicitado, resulte necesaria unha acción de reelaboración de certa complexidade, sen que se xustifique de maneira clara e suficiente, nin na resolución impugnada nin no informe emitido á reclamación, que resulte necesario ese tratamento previo ou reelaboración da información, o seu nivel de complexidade, a dispersión da información, a inexistencia de sistemas de tratamento da información ou incompatibilidade entre eles, que non permitan obter, cun un listado de proxectos eólicos tramitados coas datas nas que obtiveron o permiso o sentido da súa declaración de impacto ambiental e os que non a teñen resolta. De acordo co anterior, ao non considerarse xustificada a causa de inadmisión citada na documentación administrativa remitida, procede a estimación da reclamación presentada. En base aos feitos e fundamentos de dereito anteriormente expresados, a Comisión da Transparencia, ACORDA Primeiro: Estimar a reclamación presentada por XXX, en representación da Asociación para a Defensa Ecolóxica de Galiza (ADEGA) con data do 26 de abril de 2023, contra a Resolución do 30 de marzo de 2023, da Dirección Xeral de Planificación Enerxética e Recursos Naturais, pola que se resolve a súa solicitude de acceso ao listado de proxectos eólicos tramitados pola Xunta de Galicia. Segundo: Instar á Vicepresidencia Primeira e Consellería de Economía, Industria e Innovación a que no prazo máximo de 10 días hábiles, responda á Asociación interesada á petición de información solicitada, respectando os límites dos artigos 14 e 15 da Lei 19/2013, do 9 de decembro, e o artigo 22 da mesma lei, no que fai á formalización do acceso. Terceiro: Instar á Vicepresidencia Primeira e Consellería de Economía, Industria e Innovación a que, no prazo máximo de 15 días hábiles, remita a esta Comisión da Transparencia copia do envío ao reclamante da información solicitada. Contra esta resolución que pon fin á vía administrativa unicamente cabe, en caso de desconformidade, interpoñer recurso contencioso-administrativo no prazo de dous meses, contados desde o día seguinte á notificación desta resolución, ante a Sala do contencioso- administrativo do Tribunal Superior de Xustiza de Galicia, de conformidade co previsto no artigo 10.1 da Lei 29/1998, do 13 de xullo, reguladora da xurisdición contencioso- administrativa. Santiago de Compostela. María Dolores Fernández Galiño Presidenta da Comisión da Transparencia.