Reclamación de acceso a la información sobre principios de idoneidad y proporcionalidad en la instalación de cámaras de videovigilancia en el Concello de O Grove

ASUNTO: Resolución da Comisión da Transparencia de Galicia na reclamación presentada ao amparo da disposición adicional quinta da Lei 1/2016, do 18 de xaneiro, de transparencia e bo goberno En resposta á reclamación presentada por Nome apelido1 apelido2, mediante escrito datado o 27 de decembro de 2016, a Comisión da Transparencia, considerando os Antecedentes e Fundamentos Xurídicos que se especifican a continuación, adopta a seguinte resolución: ANTECEDENTES Primeiro. Nome apelido1 apelido2 presentou, mediante escrito con entrada no rexistro do Valedor do Pobo o día 29 de decembro de 2016, unha reclamación ao amparo do disposto na disposición adicional 5ª da Lei 1/2016, do 18 de xaneiro, de transparencia e bo goberno, por entender desatendida unha solicitude de acceso á información por parte do Concello de O Grove. O interesado indicou que o 8 de novembro de 2016 formulara unha solicitude de información pública ao Concello de O Grove para que lle achegara resposta relativa aos cumprimentos de: “o principio de idoneidade para a instalación das distintas cámaras existentes no concello, do principio de proporcionalidade para a instalación das distintas cámaras existentes no concello e do deber de informas sobre as zonas videovixiladas existentes no concello”. A reclamación viña acompañada do escrito dirixido ao concello en data 8 de novembro de 2016, que fora presentada por medio dun dos puntos de rexistro dos que dispón a Xunta de Galicia. Segundo. Con data de 19 de xaneiro deuse traslado da documentación achegada polo interesado ao Concello de O Grove para que, en cumprimento da normativa de transparencia, achegase informe e copia completa e ordenada do expediente. Consta recepción deste oficio por parte do ente municipal o 20 de xaneiro de 2017. Terceiro. Ata o día de hoxe, o Concello de O Grove nin informou a esta Comisión da Transparencia, nin remitiu o expediente iniciado a raíz da petición de acceso á información do reclamante. FUNDAMENTOS XURÍDICOS A lexislación aplicable a este procedemento ven configurada pola Lei 19/2013, de 9 de decembro, de transparencia, acceso á información pública e bo goberno, de carácter básico, e a Lei 1/2016, do 18 de xaneiro, de transparencia e bo goberno da Comunidade Autónoma de Galicia, xunto coa lexislación básica en materia de procedemento administrativo á que se remiten as anteriores. Primeiro.- Competencia O artigo 28 da Lei 1/2016, do 18 de xaneiro, de transparencia e bo goberno, establece que, contra toda resolución expresa ou presunta en materia de acceso á información pública, poderá interpoñerse unha reclamación perante o Valedor do Pobo. O artigo 33 da Lei 1/2016, do 18 de xaneiro, de transparencia e bo goberno, indica que corresponde á Comisión da Transparencia a resolución das reclamacións fronte ás resolucións de acceso á información pública que establece o artigo 28 da Lei 1/2016, do 18 de xaneiro, de transparencia e bo goberno. A disposición adicional 5ª da Lei 1/2016, de 18 de xaneiro, de transparencia e bo Goberno establece que a reclamación prevista no artigo 24 da Lei 19/2013, de transparencia, dereito á información pública e bo goberno, corresponderá, no suposto de resolucións ditadas polas entidades locais de Galicia, ao Valedor do Pobo, que é parte integrante da Comisión da Transparencia. Segundo.- Procedemento aplicable O artigo 28.3 da Lei 1/2016, do 18 de xaneiro, de transparencia e bo goberno preceptúa que o seu procedemento se axustará ao previsto nos números 2, 3, e 4 do artigo 24 da Lei 19/2013, de 9 de decembro, de transparencia, acceso á información pública e bo goberno, para as reclamacións perante o Consejo de Transparencia y Buen Gobierno. A Lei 19/2013, do 9 de decembro, pola súa parte, sinala que estamos ante unha reclamación con carácter potestativo e previo á súa impugnación en vía contencioso-administrativa, e que se axustará na súa tramitación ao disposto na lexislación de procedemento administrativo común en materia de recursos. Terceiro.- Dereito de acceso á información pública Ámbito material A Lei 1/2016, do 18 de xaneiro recoñece no seu artigo 24 o dereito de todas as persoas a acceder á información pública, entendida, como “os contidos ou documentos, calquera que sexa o seu formato ou soporte, que consten en poder dalgún dos suxeitos incluídos no ámbito de aplicación desta lei e que fosen elaborados ou adquiridos en exercicio das súas funcións”. Lexitimación O artigo 12 da Lei 19/2013, do 9 de decembro, configura o dereito de acceso á información pública de forma ampla, sendo titulares do mesmo todas as persoas. A Lei 1/2016, do 18 de xaneiro, sinala que a persoa solicitante non está obrigada a motivar a súa solicitude de acceso á información, no seu artigo 26.4. Limitacións que poden afectar ao seu exercicio: A Lei 19/2013, do 9 de decembro, prevé nos artigos 14 e 15 uns límites ao dereito ao acceso, por razón da materia e por mor da protección dos datos de carácter persoal. Todas as solicitudes, que non entren dentro destes límites deberán ser atendidas, agás que existan limitacións e así se xustifiquen debidamente co chamado test de danos, ou algunha das causas de inadmisión do artigo 18 desta lei. Cuarto.- Análise do expediente A Comisión da Transparencia se atopa, por unha banda, ante a reticencia do Concello do Grove a colaborar na resolución da reclamación dun particular, da que dispón só dos datos achegados inicialmente por esta persoa. Nesta situación de silencio administrativo negativo (artigo 20.4 da Lei 19/2013, de 9 de decembro) hai que atender ao disposto no artigo 35 da Lei 1/2016, do 18 de xaneiro, que establece que os suxeitos incluídos no ámbito de aplicación desta lei de transparencia “prestarán a colaboración necesaria ao Valedor do Pobo para o correcto desenvolvemento das súas funcións, facilitando a información que lles solicite no seu respectivo ámbito competencial”. O noso ordenamento esixe, ademais, dilixencia dos poderes públicos na resolución administrativa. Para reforzar esta obriga é de aplicación o disposto na Lei 39/2015, de 1 de outubro, de procedemento administrativo común das administracións públicas, que no seu artigo 21 impón o mandado de resolver e notificar a resolución, calquera que sexa o xeito de iniciación dun procedemento. A Lei 19/2013, do 9 de decembro, no seu artigo 20.6 establece que o incumprimento reiterado da obrigación de resolver en prazo terá a consideración de infracción grave para os efectos da aplicación aos responsables do réxime disciplinario previsto na correspondente normativa reguladora. Esta Comisión ten que lembrar ao Concello de O Grove, de que a incidencia detectada na presente reclamación, activa o control de tal obriga, polo que se procede a dar parte da presente resolución ao Comisionado da Transparencia de Galicia, para o seu seguimento. Entrando no obxecto da solicitude, por outra banda, o interesado demanda ao Concello de O Grove un pronunciamento acerca do cumprimento dos principios de idoneidade e proporcionalidade, e do deber de informar, en zonas municipais vídeo vixiadas. O obxecto da solicitude de información pública non coincide neste particular co propio concepto de información pública definido na lei 1/2016, do 18 de xaneiro como “os contidos ou documentos, calquera que sexa o seu formato ou soporte, que consten en poder dalgún dos suxeitos incluídos no ámbito de aplicación desta lei e que fosen elaborados ou adquiridos en exercicio das súas funcións”. O interesado está a solicitar unha valoración xurídica sobre o axuste dunha decisión administrativa a principios xerais do ordenamento xurídico. Esa valoración non se axusta a esa definición ao non poder ser considerada nin un contido nin un documento elaborado ou adquirido para o exercicio das funcións dos suxeitos sometidos á transparencia. Quinto.- En conclusión, procede inadmitir a reclamación xa que o obxecto no que se basea non coincide co concepto de información pública definido na normativa de transparencia. En canto a ausencia de colaboración de o Concello de O Grove, a Comisión da Transparencia proceder a comunicar a presente resolución ao Comisionado da Transparencia para que active o seguimento do control da transparencia ante unha posible reiteración que puidera ocasionar actuacións no eido disciplinario. RESOLUCIÓN En atención aos anteriores antecedentes e fundamentos xurídicos, procede Inadmitir a reclamación presentada por Nome apelido1 apelido2 con data 29 de decembro de 2016 contra a denegación por silencio do Concello de O Grove, por inadecuación do obxecto da mesma ao concepto de información pública que da dereito ao acceso; e informar desta resolución ao Comisionado da Transparencia. Contra esta resolución, que pon fin á vía administrativa, unicamente cabe, en caso de desconformidade, interpoñer recurso contencioso-administrativo no prazo de dous meses, contados desde o día seguinte á notificación desta resolución, de conformidade co previsto no artigo 8.2 a Lei 29/1998, do 13 de xullo, reguladora da xurisdición contencioso-administrativa. A presidenta da Comisión da Transparencia Milagros Otero Parga