Solicitud de justificación de idoneidad y proporcionalidad de cámaras de videovigilancia en el Pazo de Raxoi y resultado de inadmisión

ASUNTO: Resolución da Comisión da Transparencia de Galicia na reclamación presentada ao amparo do artigo 28 da Lei 1/2016, do 18 de xaneiro, de transparencia e bo goberno En resposta á reclamación presentada por Nome apelido1 apelido2, mediante escrito datado o 23 de xuño de 2017, a Comisión da Transparencia, considerando os Antecedentes e Fundamentos Xurídicos que se especifican a continuación, adopta a seguinte resolución: ANTECEDENTES Primeiro. Nome apelido1 apelido2 presentou, mediante escrito con entrada no rexistro do Valedor do Pobo o día 23 de xuño de 2017, unha reclamación ao amparo do disposto no artigo 28 da Lei 1/2016, do 18 de xaneiro, de transparencia e bo goberno, por entender desatendida unha solicitude de acceso á información por parte da Vicepresidencia e Consellería de Presidencia, Administracións Públicas e Xustiza. O interesado indicou que o 29 de decembro de 2016 formulara unha solicitude de información pública á Vicepresidencia e Consellería de Presidencia, Administracións Públicas e Xustiza para que lle achegara resposta relativa á: “ Xustificación dos principios de idoneidade e proporcionalidade en relación coas cámaras de videovixilancia instaladas na sede ubicada no pazo de Raxoi”. A reclamación viña acompañada do escrito dirixido á Vicepresidencia e Consellería de Presidencia, Administracións Públicas e Xustiza en data 29 de decembro de 2016. FUNDAMENTOS XURÍDICOS Primeiro.- Recurso e competencia para resolvelo. O artigo 24 da Lei 19/2013, do 9 de decembro, de transparencia, acceso á información pública e bo goberno, de carácter básico na súa práctica totalidade, establece que contra toda resolución expresa ou presunta en materia de acceso poderá interpoñerse unha reclamación ante o Consejo de Transparencia y Buen Gobierno, con carácter potestativo e previa a súa impugnación en vía contencioso-administrativa. Esa mesma lei, na súa disposición adicional cuarta, establece que a resolución da reclamación prevista no artigo 24 corresponderá, nos supostos de resolucións ditadas polas Administracións das Comunidades autónomas e o seu sector público, e polas Entidades Locais comprendidas no seu ámbito territorial, ao órgano independente que determinen as Comunidades Autónomas. A lexislación aplicable a este procedemento ven configurada pola citada Lei 19/2013 e pola Lei 1/2016, xunto coa lexislación básica en materia de procedemento administrativo. O artigo 28 da Lei 1/2016 establece que contra toda resolución expresa ou presunta en materia de acceso á información pública poderá interpoñerse unha reclamación perante o Valedor do Pobo; e o artigo 33 da mesma lei indica que corresponde á Comisión da Transparencia (órgano colexiado) a resolución das reclamacións fronte ás resolucións de acceso á información pública que establece o seu artigo 28. A disposición adicional 5ª da lei establece que resolver esas reclamacións corresponderá, no suposto de resolucións ditadas polas entidades locais de Galicia, ao Valedor do Pobo, ao que adscríbese a Comisión da Transparencia, que por tanto é a competente. Segundo.- Procedemento. O artigo 28.3 da Lei 1/2016 preceptúa que o procedemento se axustará ao previsto nos números 2, 3, e 4 do artigo 24 da Lei 19/2013. Esta lei 19/2013 sinala que estamos ante unha reclamación con carácter potestativo e previa á impugnación en vía contencioso-administrativa e que se axustará na súa tramitación ao disposto na lexislación de procedemento administrativo común en materia de recursos. Terceiro.- Dereito de acceso á información pública. A Lei 1/2016 recoñece no seu artigo 24 o dereito de todas as persoas a acceder á información pública, entendida como “os contidos ou documentos, calquera que sexa o seu formato ou soporte, que consten en poder dalgún dos suxeitos incluídos no ámbito de aplicación desta lei e que fosen elaborados ou adquiridos en exercicio das súas funcións”. O artigo 12 da Lei 19/2013 configura o dereito de acceso á información pública de forma ampla, sendo titulares do mesmo todas as persoas. A Lei 1/2016 sinala que o solicitante non está obrigada a motivar a súa solicitude de acceso á información (artigo 26.4). Cuarto.- Análise do expediente O interesado realiza unha consulta en relación á administración autonómica acerca do cumprimento dos principios de idoneidade e proporcionalidade en relación a unhas cámaras de vídeo vixilancia. Esta consulta, polo seu propio contido, non entra dentro do concepto de información pública definido na lei 1/2016, do 18 de xaneiro como “os contidos ou documentos, calquera que sexa o seu formato ou soporte, que consten en poder dalgún dos suxeitos incluídos no ámbito de aplicación desta lei e que fosen elaborados ou adquiridos en exercicio das súas funcións”. En efecto, o interesado está a solicitar unha valoración xurídica sobre a adecuación dunha decisión administrativa aos principios xerais do ordenamento xurídico. Esa valoración é unha consulta de aclaración que pode entenderse como información de carácter puramente administrativo o de funcionamento, non estando dentro da definición legal do que debe considerarse como información pública. Isto non significa que a consulta non teña que ser respondida, senón que a Comisión da Transparencia non é competente para entra no fondo do asunto, ao non estar amparada a solicitude na lexislación de transparencia non sendo pois susceptible de utilizar os medios de impugnación previstos en dita normativa. Quinto.- Procede inadmitir directamente a reclamación xa que o solicitado pola persoa interesada non se enmarca dentro do concepto de información pública definido polo artigo 24 da Lei 1/2016, do 18 de xaneiro. En conclusión, a Comisión da Transparencia ACORDA En atención aos anteriores antecedentes e fundamentos xurídicos, procede Inadmitir a reclamación presentada por Nome apelido1 apelido2 con data 23 de xuño de 2017 contra a denegación por silencio da Vicepresidencia e Consellería de Presidencia, Administracións Públicas e Xustiza, por non ser considerado información pública o solicitado pola persoa interesada, de conformidade coa normativa reguladora en materia de transparencia. Contra esta resolución, que pon fin á vía administrativa, unicamente cabe, en caso de desconformidade, interpoñer recurso contencioso-administrativo no prazo de dous meses, contados desde o día seguinte á notificación desta resolución, de conformidade co previsto no artigo 8.2 a Lei 29/1998, do 13 de xullo, reguladora da xurisdición contencioso-administrativa. Santiago de Compostela, 20 de xullo de 2017 A presidenta da Comisión da Transparencia Milagros Otero Parga