Reclamación por desatención de solicitud de acceso a la información pública ante la Consellería de Política Social

ASUNTO: Resolución da Comisión da Transparencia de Galicia na reclamación presentada ao amparo do artigo 28 da Lei 1/2016, do 18 de xaneiro, de transparencia e bo goberno En resposta á reclamación presentada por xxxxxxxxx xxxxxxxxx xxxxxxxxxx, mediante escrito do 6 de xuño de 2017, a Comisión da Transparencia, considerando os antecedentes e fundamentos xurídicos que se especifican a continuación, adopta a seguinte resolución: ANTECEDENTES Primeiro. xxxxxxxxx xxxxxxxxx xxxxxxxxxx presentou, mediante escrito con entrada no rexistro do Valedor do Pobo o día 6 de xuño de 2017, unha reclamación ao amparo do disposto no artigo 28 da Lei 1/2016, do 18 de xaneiro, de transparencia e bo goberno, por entender desatendida unha solicitude de acceso á información por parte da xefatura territorial da Consellería de Política Social na Coruña. O escrito non viña acompañado de documentación, mais permitía ter constancia da identidade do solicitante, a información solicitada, a dirección de contacto e a modalidade que se prefería para acceder á información solicitada nos termos do artigo 17 da Lei 19/2013, do 9 de decembro. A Comisión da Transparencia como órgano colexiado externo independente adscrito ao Valedor do Pobo, carecía de antecedentes, polo que o día 15 de xuño de 2017 solicita diversa documentación á propia interesada, e solicita á consellería de Política social que “informe sobre a existencia das solicitudes de 9 e 30 de maio, os trámites realizados e a información pública obxecto da solicitude tal e como contempla a Lei 1/2016, do 18 de xaneiro”. A interesada non achega a documentación solicitada. O informe da Consellería e o expediente remitido recollen claramente e en exclusiva a existencia da solicitude de 30 de maio de 2017. Segundo O interesado achega unha petición extemporánea tendo en conta que a data de presentación da reclamación é o 6 de xuño de 2017, por tanto, e tal como recolle a propia Consellería o prazo para resolver e notificar a solicitude finalizaría non antes do 30 de xuño de 2017, pois o prazo para resolver do artigo 20 da Lei 19/2013, do 9 de decembro computa desde a recepción da solicitude polo órgano competente para resolvelo. Terceiro En todo caso compre sinalar que á vista do expediente, consta que a documentación se lle entregou en tempo e forma. FUNDAMENTOS XURÍDICOS Primeiro. Competencia e normativa O artigo 24 da Lei 19/2013, do 9 de decembro, de transparencia, acceso á información pública e bo goberno, de carácter básico na súa práctica totalidade, establece que contra toda resolución expresa ou presunta en materia de acceso poderá interpoñerse unha reclamación ante o Consejo de Transparencia y Buen Gobierno, con carácter potestativo e previa a súa impugnación en vía contencioso-administrativa. Esa mesma lei, na súa disposición adicional cuarta, establece que a resolución da reclamación prevista no artigo 24 corresponderá, nos supostos de resolucións ditadas polas Administracións das Comunidades autónomas e o seu sector público, e polas Entidades Locais comprendidas no seu ámbito territorial, ao órgano independente que determinen as Comunidades Autónomas. A lexislación aplicable a este procedemento ven configurada pola citada Lei 19/2013 e pola Lei 1/2016, xunto coa lexislación básica en materia de procedemento administrativo. O artigo 28 da Lei 1/2016 establece que contra toda resolución expresa ou presunta en materia de acceso á información pública poderá interpoñerse unha reclamación perante o Valedor do Pobo; e o artigo 33 da mesma lei indica que corresponde á Comisión da Transparencia (órgano colexiado) a resolución das reclamacións fronte ás resolucións de acceso á información pública que establece o seu artigo 28. Segundo. Procedemento aplicable O artigo 28.3 da Lei 1/2016 preceptúa que o procedemento se axustará ao previsto nos números 2, 3, e 4 do artigo 24 da Lei 19/2013. Esta lei 19/2013 sinala que estamos ante unha reclamación con carácter potestativo e previa á impugnación en vía contencioso-administrativa e que se axustará na súa tramitación ao disposto na lexislación de procedemento administrativo común en materia de recursos. Terceiro. Prazos de interposición do recurso O artigo 24.2 da Lei 19/2013, do 9 de decembro, establece que a reclamación se interporá no prazo dun mes a contar desde o día seguinte ao da notificación do acto impugnado o desde o día seguinte a aquel no que se produzan os efectos do silencio administrativo. O artigo 116 d) da Lei de procedemento administrativo común das Administracións Públicas, de 1 de outubro, establece que será causa de inadmisión ter transcorrido o prazo para a interposición do recurso. O 30 de maio de 2017, a Comisión da Transparencia acordou en sesión ordinaria, por unanimidade, a aprobación do seguinte acordo: “Delegar na Presidencia as resolucións de inadmisión das reclamacións presentadas no exercicio do dereito de acceso á información pública que sexan extemporáneas, tanto porque son presentadas antes de que transcorra o prazo para resolver polo suxeito ao que se lle solicita, como por tratarse dunha reclamación na que ten transcorrido o prazo para dirixir o recurso ante a comisión.” Cuarto. Análise do expediente A petición que a interesada dirixiu á Consellería de Política Social, ten rexistro da xefatura territorial de Política Social Coruña o día 30 de maio de 2017, ás 13.01 horas. Este escrito vai dirixido ao xefe do servizo de coordinación administrativa. O artigo 20.1 da Lei 19/2013, do 9 de decembro, indica que a resolución na que se conceda ou denegue o acceso deberá notificarse ao solicitante e aos terceiros afectados que así o solicitasen no prazo máximo dun mes desde a recepción da solicitude polo órganos competente para resolver, por tanto a reclamación dirixida á Comisión da Transparencia ten lugar antes de que transcorrera o prazo para resolver a consellería. En conclusión, a Comisión da Transparencia ACORDA En atención aos anteriores antecedentes, fundamentos xurídicos, procede Único: Inadmitir a reclamación presentada por xxxxxxxxx xxxxxxxxx xxxxxxxxxx con data 6 de xuño de 2017. Contra esta resolución, que pon fin á vía administrativa, unicamente cabe, en caso de desconformidade, interpoñer recurso contencioso-administrativo, no prazo de dous meses, contados desde o día seguinte á notificación desta resolución, de conformidade co previsto no artigo 8.3 a Lei 29/1998, do 13 de xullo, reguladora da xurisdición contencioso-administrativa. Santiago de Compostela, 16 de outubro de 2017 A presidenta da Comisión da Transparencia Milagros Otero Parga