Reclamación por denegación de acceso a información pública sobre jornadas técnicas a la Confraría de Pescadores de Celeiro

ASUNTO: Resolución da Comisión da Transparencia de Galicia na reclamación presentada ao amparo do artigo 28 da lei 1/2016, do 18 de xaneiro, de transparencia e bo goberno En resposta á reclamación presentada por en nome e representación mediante escrito do 20 de novembro de 2017, a Comisión da Transparencia, considerando os antecedentes e fundamentos xurídicos que se especifican a continuación, adopta a seguinte resolución: ANTECEDENTES Primeiro. en nome - presentou, mediante escrito con entrada no rexistro do Valedor do Pobo o día 20 de novembro de 2017, unha reclamación ao amparo do disposto no artigo 28 da Lei 1/2016, do 18 de xaneiro, de transparencia e bo goberno, por entender desestimada unha solicitude de acceso á información por parte da Confraría de Pescadores de Celeiro. O interesado indicaba que ante a celebración das xornadas técnicas de difusión do sector pesqueiro en Celeiro os días 24 e 25 de novembro de 2017 pedira información á Confraría de Pescadores de Celeiro. Para unha mellor comprensión do expediente hai que facer constar que tendo coñecemento de que estas xornadas íanse celebrar e que nelas participaban diversas persoas xurídicas o reclamante se dirixiu á Confraría de Pescadores de Celeiro, o Concello de Viveiro, o Porto de Celeiro, o GAC1 e a Consellería do Mar demandando a cada un información complementaria sobre o evento, á vista de que a información requirida para cada persoa xurídica era diferente, e que as obrigas de transparencia e as peticións diferían para cada unha delas optouse por iniciar cinco expedientes distintos e notificar a todos os organizadores das xornadas técnicas a existenza dos restantes expedientes, incidindo para cada persoa xurídica en as particularidades nas que o informe debería centrarse. O escrito viña acompañado da solicitude de 19 de outubro de 2017 dirixida á Confraría de Pescadores de Celeiro. Segundo. Con data 24 de novembro de 2017 déuselle traslado da documentación achegada polo interesado á Confraría de Pescadores de Celeiro para que, en cumprimento da normativa de transparencia, achegase informe no que se determinase a recepción da petición, con indicación de quen elaborou integramente ou xerou a información de cada un dos asuntos nos que se solicitaba información e que igualmente se indicase se toda a información solicitada se inclúe dentro das actividades suxeitas a dereito administrativo tal como o recolle a Lei 1/2016, do 18 de xaneiro. A recepción da solicitude pola Confraría de Pescadores de Celeiro foi o 28 de novembro de 2017. Terceiro. Con data do 13 de decembro de 2017 se recibiu o informe da Confraría. O informe, en resumo, indicou que as xornadas foran organizadas por unha entidade privada que é o Porto de Celeiro S.A, co que colaborou en exercicio dunha actividade propia allea ao ámbito administrativo. A Confraría es unha corporación de dereito público que realizou unha actividade que non está suxeita ao dereito administrativo e por tanto fora do control do ámbito de aplicación da Lei 19/2013, do 9 de decembro, e Lei 1/2016, do 18 de xaneiro. En todo caso a solicitude debía ter sido inadmitida polo seu carácter abusivo non xustificado coa finalidade da transparencia. A confraría entende que o que se persigue con este escrito é a imputación de delitos sen a mínima base e falseando a realidade, feitos que de ser certos poderían ser denunciados ante os tribunais de xustiza e non limitarse a plasmar acusacións en escritos que difunde a través dunha páxina web. FUNDAMENTOS XURÍDICOS Primeiro. Competencia e normativa O artigo 24 da Lei 19/2013, do 9 de decembro, de transparencia, acceso á información pública e bo goberno, de carácter básico na súa práctica totalidade, establece que contra toda resolución expresa ou presunta en materia de acceso poderá interpoñerse unha reclamación ante o Consejo de Transparencia y Buen Gobierno, con carácter potestativo e previa a súa impugnación en vía contencioso-administrativa. Esa mesma lei, na súa disposición adicional cuarta, establece que a resolución da reclamación prevista no artigo 24 corresponderá, nos supostos de resolucións ditadas polas Administracións das Comunidades autónomas e o seu sector público, e polas Entidades Locais comprendidas no seu ámbito territorial, ao órgano independente que determinen as Comunidades Autónomas. A lexislación aplicable a este procedemento vén configurada pola citada Lei 19/2013, do 9 de decembro, e pola Lei 1/2016, do 18 de xaneiro xunto coa lexislación básica en materia de procedemento administrativo. O artigo 28 da Lei 1/2016, do 18 de xaneiro, establece que contra toda resolución expresa ou presunta en materia de acceso á información pública poderá interpoñerse unha reclamación perante o Valedor do Pobo; e o artigo 33 da mesma lei indica que corresponde á Comisión da Transparencia (órgano colexiado) a resolución das reclamacións fronte ás resolucións de acceso á información pública que establece o seu artigo 28. A disposición adicional quinta da lei establece que resolver esas reclamacións corresponderá, no suposto de resolucións ditadas polas entidades locais de Galicia, ao Valedor do Pobo, ao que adscríbese a Comisión da Transparencia, que por tanto é a competente para resolver. Segundo. Procedemento aplicable O artigo 28.3 da Lei 1/2016, do 18 de xaneiro preceptúa que o procedemento se axustará ao previsto nos números 2, 3, e 4 do artigo 24 da Lei 19/2013, do 9 de decembro. Esta lei 19/2013, do 9 de decembro, sinala que estamos ante unha reclamación con carácter potestativo e previa á impugnación en vía contencioso-administrativa e que se axustará na súa tramitación ao disposto na lexislación de procedemento administrativo común en materia de recursos. Terceiro. Dereito de acceso á información pública A Lei 1/2016, do 18 de xaneiro, recoñece no seu artigo 24 o dereito de todas as persoas a acceder á información pública, entendida como “os contidos ou documentos, calquera que sexa o seu formato ou soporte, que consten en poder dalgún dos suxeitos incluídos no ámbito de aplicación desta lei e que fosen elaborados ou adquiridos en exercicio das súas funcións”. O artigo 12 da Lei 19/2013, do 9 de decembro, configura o dereito de acceso á información pública de forma ampla, sendo titulares do mesmo todas as persoas. A Lei 1/2016, do 18 de xaneiro, sinala que o solicitante non está obrigada a motivar a súa solicitude de acceso á información (artigo 26.4). Cuarto. Análise do expediente Corresponde á Comisión da Transparencia analizar se se solicitou a información que o reclamante di ter solicitado, toda vez que o requirimento dirixido á Confraría de Pescadores de Celeiro carecía dun mínimo recibí ou rexistro de entrada, igualmente corresponde determinar se a persoa xurídica á que se dirixiu está obrigada legalmente, en caso de que todas estas cuestións fosen afirmativas correspondería determinar se a petición realizada en primeira instancia se axusta ao concepto de información pública e, de axustarse, determinar se hai dereito a que se produza o acceso en relación ao disposto nos artigos 14, 15 e 18 da Lei 19/2013, do 9 de decembro e finalmente corresponde á comisión facer un seguimento da resolución emitida no sentido de ser informada da recepción da información reclamada ante esta. Unha vez determinado o asunto obxecto de estudo hai que indicar que se ben a Confraría de Pescadores nin nega nin confirma que recibira o escrito está claro que as confrarías só desenvolven funcións de carácter administrativo cando actúan como órgano de Consulta e Colaboración coa administración na promoción do sector pesqueiro. (Lei 11/2008, de Pesca de Galicia). Neste caso tal como di o informe tratábase da colaboración co Porto de Celeiro, que é unha entidade privada. O ámbito subxectivo de aplicación da Lei da Transparencia 1/2016, do 18 de xaneiro, implica que esta será aplicable a calquera entidade privada que reciba ou xestione fondos públicos ou cuxa actividade teña interese público ou repercusión social nos termos previstos. Agora ben, a obriga de subministrar a información non é a calquera persoa que o demande se non a Administración, organismo ou entidade das previstas no artigo 3.1 a que se encontren vinculadas, logo de requirimento. (artigos 3 e 4 Lei 1/2016, do 18 de xaneiro). Por tanto, se o reclamante quería esta información debeuse dirixir ao Ente Público de Portos ou á Consellería do Mar ( a quen lle requiríu información como se verá no expediente RSCTG 110/2017) para todo o evento e non dirixirse directamente á Confraría de Pescadores de Celeiro, salvo que se tratase de actividades suxeitas a dereito administrativo, o que non se da neste caso. Corresponde por tanto aplicar o artigo 116 da Lei 39/2015, do 1 de outubro que establece que se inadmitirán aqueles recursos que carezan manifestamente de fundamento. En conclusión, a Comisión da Transparencia ACORDA En atención aos anteriores antecedentes, fundamentos xurídicos, procede Único. Inadmitir a reclamación presentada por en representación da con data de 20 de novembro de 2017, contra a solicitude dirixida á Confraría de Pescadores de Celeiro por carecer manifestamente de fundamento. Contra esta resolución, que pon fin á vía administrativa, unicamente cabe, en caso de desconformidade, interpoñer recurso contencioso-administrativo, no prazo de dous meses, contados desde o día seguinte á notificación desta resolución, de conformidade co previsto no artigo 8.3 a Lei 29/1998, do 13 de xullo, reguladora da xurisdición contencioso- administrativa. Santiago de Compostela, 31 de xaneiro de 2018 A presidenta da Comisión da Transparencia Milagros Otero Parga