Reclamación sobre acceso a información pública relativa a jornadas técnicas del sector pesquero en Celeiro

ASUNTO: Resolución da Comisión da Transparencia de Galicia na reclamación presentada ao amparo do artigo 28 da lei 1/2016, do 18 de xaneiro, de transparencia e bo goberno En resposta á reclamación presentada por D en nome e representación mediante escrito do 20 de novembro de 2017, a Comisión da Transparencia, considerando os antecedentes e fundamentos xurídicos que se especifican a continuación, adopta a seguinte resolución: ANTECEDENTES Primeiro. en nome e representación presentou, mediante escrito con entrada no rexistro do Valedor do Pobo o día 20 de novembro de 2017, unha reclamación ao amparo do disposto no artigo 28 da Lei 1/2016, do 18 de xaneiro, de transparencia e bo goberno, por entender desestimada unha solicitude de acceso á información por parte Da Consellería do Mar. O interesado indicaba que ante a celebración das xornadas técnicas de difusión do sector pesqueiro en Celeiro os días 24 e 25 de novembro de 2017 pedira información á Consellería do Mar. Para unha mellor comprensión do expediente hai que facer constar que tendo coñecemento de que estas xornadas íanse celebrar e que nelas participaban diversas persoas xurídicas o reclamante se dirixiu á Confraría de Pescadores de Celeiro, o Concello de Viveiro, o Porto de Celeiro, o GAC1 e a Consellería do Mar demandando a cada un información complementaria sobre o evento, á vista de que a información requirida para cada persoa xurídica era diferente, e que as obrigas de transparencia e as peticións diferían para cada unha delas optouse por iniciar cinco expedientes distintos e notificar a todos os organizadores das xornadas técnicas a existenza dos restantes expedientes, incidindo para cada persoa xurídica en as particularidades nas que o informe debería centrarse. O escrito viña acompañado da solicitude de 19 de outubro de 2017 dirixida á Consellería do Mar. Segundo. Con data 24 de novembro de 2017 déuselle traslado da documentación achegada polo interesado á administración para que, en cumprimento da normativa de transparencia, achegase informe e expediente administrativo. A recepción da solicitude pola consellería foi o 5 de decembro de 2017. Terceiro. Con data do 28 de decembro de 2017 se recibiu o informe e o expediente elaborado pola Consellería do Mar. O informe, en resumo, indicou que o 19 de outubro se recibiu na sede electrónica da Xunta a solicitude presentada polo reclamante sendo a recepción na unidade tramitadora o 2 de novembro de 2017. A información se lle achegou dende a Dirección Xeral de Desenvolvemento Pesqueiro o 29 de novembro de 2017, e, se ben, esta resolución di que se estimou parcialmente o acceso foi concedido conforme á petición recibida. FUNDAMENTOS XURÍDICOS Primeiro. Competencia e normativa O artigo 24 da Lei 19/2013, do 9 de decembro, de transparencia, acceso á información pública e bo goberno, de carácter básico na súa práctica totalidade, establece que contra toda resolución expresa ou presunta en materia de acceso poderá interpoñerse unha reclamación ante o Consejo de Transparencia y Buen Gobierno, con carácter potestativo e previa a súa impugnación en vía contencioso-administrativa. Esa mesma lei, na súa disposición adicional cuarta, establece que a resolución da reclamación prevista no artigo 24 corresponderá, nos supostos de resolucións ditadas polas Administracións das Comunidades autónomas e o seu sector público, e polas Entidades Locais comprendidas no seu ámbito territorial, ao órgano independente que determinen as Comunidades Autónomas. A lexislación aplicable a este procedemento ven configurada pola citada Lei 19/2013 e pola Lei 1/2016, xunto coa lexislación básica en materia de procedemento administrativo. O artigo 28 da Lei 1/2016 establece que contra toda resolución expresa ou presunta en materia de acceso á información pública poderá interpoñerse unha reclamación perante o Valedor do Pobo; e o artigo 33 da mesma lei indica que corresponde á Comisión da Transparencia (órgano colexiado) a resolución das reclamacións fronte ás resolucións de acceso á información pública que establece o seu artigo 28. A disposición adicional quinta da lei establece que resolver esas reclamacións corresponderá, no suposto de resolucións ditadas polas entidades locais de Galicia, ao Valedor do Pobo, ao que adscríbese a Comisión da Transparencia, que por tanto é a competente. Segundo. Procedemento aplicable O artigo 28.3 da Lei 1/2016 preceptúa que o procedemento se axustará ao previsto nos números 2, 3, e 4 do artigo 24 da Lei 19/2013. Esta lei 19/2013 sinala que estamos ante unha reclamación con carácter potestativo e previa á impugnación en vía contencioso- administrativa e que se axustará na súa tramitación ao disposto na lexislación de procedemento administrativo común en materia de recursos. Terceiro. Prazos de interposición do recurso O artigo 24.2 da Lei 19/2013, do 9 de decembro, establece que a reclamación se interporá no prazo dun mes a contar desde o día seguinte ao da notificación do acto impugnado o desde o día seguinte a aquel no que se produzan os efectos do silencio administrativo. O artigo 116 d) da Lei de procedemento administrativo común das Administracións Públicas, de 1 de outubro, establece que será causa de inadmisión ter trascorrido o prazo para a interposición do recurso. O 30 de maio de 2017, a Comisión da Transparencia acordou en sesión ordinaria, por unanimidade, a aprobación do seguinte acordo: “Delegar na Presidencia as resolucións de inadmisión das reclamacións presentadas no exercicio do dereito de acceso á información pública que sexan extemporáneas, tanto porque son presentadas antes de que transcorra o prazo para resolver polo suxeito ao que se lle solicita, como por tratarse dunha reclamación na que ten transcorrido o prazo para dirixir o recurso ante a comisión.” Cuarto. Análise do expediente O reclamante presentou a súa petición o 19 de outubro de 2017 na sede electrónica, a solicitude non chegou á unidade tramitadora ata o 2 de novembro de 2017, en todo caso, consta a existencia dunha resolución da Consellería do 29 de novembro de 2017 concedéndolle o acceso. En conclusión, a Comisión da Transparencia ACORDA En atención aos anteriores antecedentes, fundamentos xurídicos, procede Único: Estimar por motivos formais a reclamación presentada por , en nome e representación de Pladesemapesga con data de 20 de novembro de 2017, contra a Consellería do Mar, sen que sexa necesaria ningunha outra actuación. Contra esta resolución, que pon fin á vía administrativa, unicamente cabe, en caso de desconformidade, interpoñer recurso contencioso-administrativo, no prazo de dous meses, contados desde o día seguinte á notificación desta resolución, de conformidade co previsto no artigo 8.3 a Lei 29/1998, do 13 de xullo, reguladora da xurisdición contencioso- administrativa. Santiago de Compostela, 31 de xaneiro de 2018 A presidenta da Comisión da Transparencia Milagros Otero Parga