Inadmisión de reclamación sobre solicitud de certificado de contenido web al Servicio Galego de Saúde

ASUNTO: Resolución da Comisión da Transparencia de Galicia na reclamación presentada ao amparo do artigo 28 da Lei 1/2016, do 18 de xaneiro, de transparencia e bo goberno Viasta a reclamación presentada por , que tivo entrada no Rexistro do Valedor do Pobo con data do 20 de maio de 2018, contra a desestimación por silencio administrativo da súa solicitude ao Servicio Galego de Saúde de emisión de certificado sobre o contido da web do dito organismo do seguinte link : https://www.sergas.es/ Docs/Emortada/Eventos/XIX_ConctresoDyS2010.pdf, a Comisión da Transparencia, considerando os antecedentes e fundamentos xurídicos que se especifican a continuación, adopta o seguinte acordo: ANTECEDENTES Primeiro. . en representación da Plataforma , mediante escrito do 21 de maio de 2018, que tivo entrada no Rexistro do Valedor do Pobo o 22 do mesmo mes, presenta reclamación contra a desestimación, por silencio administrativo, da súa solicitude ao Servicio Galego de Saúde, de emisión de certificado sobre o contido da web do dito organismo do seguinte link : https://www.sergas.es/ Docs/Emortada/Eventos/XIX_ConctresoDyS2010.pdf. Segundo. Con data do 23 de maio de 2018, solicitouse informe ao Servicio Galego de Saúde sobre o recurso presentado. A recepción da solicitude pola administración foi o 30 de maio de 2018. Con data do 14 de xuño ten entrada no Rexistro do Valedor do Pobo o informe solicitado, que no que no referente ás competencias desta Comisión interesa, manifesta que o interesado solicitou con data do 15 de marzo de 2018, que se lle fora expedida, dentro do prazo de 15 días referido no artigo 24.4 da Lei 39/2015, do 1 de outubro, a correspondente certificación do sentido do contido publicado dun determinado apartado da web do www.sergas.es, acompañando coa súa solicitude, a documentación impresa que aparecía na páxina dá rede internet indicada, polo que a finalidade dá solicitude non era obtención de información pública, dado que xa están non seu poder, senón un certificado da información contida nun determinado apartado da páxina web do SERGAS. FUNDAMENTOS XURÍDICOS Primeiro. Competencia e normativa O artigo 24 da Lei 19/2013, do 9 de decembro, de transparencia, acceso á información pública e bo goberno, de carácter básico na súa práctica totalidade, establece que contra toda resolución expresa ou presunta en materia de acceso á información, poderá interpoñerse unha reclamación ante o Consejo de Transparencia y Buen Gobierno, con carácter potestativo e previa a súa impugnación en vía contencioso-administrativa. Esa mesma lei, na súa disposición adicional cuarta, establece que a resolución da reclamación prevista no artigo 24 corresponderá, nos supostos de resolucións ditadas polas Administracións das Comunidades autónomas e o seu sector público, e polas Entidades Locais comprendidas no seu ámbito territorial, ao órgano independente que determinen as Comunidades Autónomas. O artigo 28 da Lei 1/2016, do 18 de xaneiro, de transparencia e bo goberno, establece que contra toda resolución expresa ou presunta en materia de acceso á información pública, poderá interpoñerse unha reclamación perante o Valedor do Pobo, correspondendo á Comisión da Transparencia, de acordo co disposto no artigo 33, a resolución das ditas reclamacións. Segundo. Procedemento aplicable O artigo 28.3 da citada Lei 1/2016 establece que o procedemento de reclamación se axustará ao previsto nos parágrafos 2, 3, e 4 do artigo 24 da Lei 19/2013, que establece que as reclamacións contra resolucións en materia de acceso á información, que ten carácter potestativo e previo á impugnación en vía contencioso-administrativa, axustarán a súa tramitación ao disposto na lexislación de procedemento administrativo común en materia de recursos. Terceiro. Dereito de acceso á información pública A lei 1/2016, de 18 de xaneiro, recoñece no seu art. 24 o dereito de todas as persoas a acceder á información pública, entendida esta como os contidos ou documentos, calquera que sexa o seu formato ou soporte, que consten en poder dalgún dos suxeitos incluídos no ámbito de aplicación desta lei e que fosen elaborados ou adquiridos en exercicio das súas funcións, do mesmo xeito que a definición contida no artigo 13 da Lei estatal 19/2013 que ten carácter básico. O concepto de información pública e o dereito de acceso á mesma se configuran de forma ampla tanto na normativa autonómica como na estatal. Os titulares do dereito son todas as persoas, sen que o solicitante estea obrigado a motivar a súa solicitude de acceso á información (art. 26.4 Lei 1/2016, de 18 de xaneiro). O obxecto da lei 19/2013, é ampliar e reforzar a transparencia da actividade pública e regular e garantir o dereito de acceso a información relativa a aquela actividade (art. 1). No seu preámbulo sinala que a transparencia, o acceso á información pública e as normas de bo goberno deben ser os eixos fundamentais de toda acción política e só cando a acción dos responsables públicos se somete a escrutinio, cando os cidadáns poden coñecer como se toman as decisións que lles afectan, como se manexan os fondos públicos ou baixo que criterios actúan as nosas institucións se pode falar do inicio dun proceso no que os poderes públicos comezan a responder a unha sociedade que é crítica, esixente e que demanda participación dos poderes públicos. Pola súa banda, a Lei galega 1/2016, sinala na súa Exposición de Motivos que a crecente exixencia cidadá de control público da actuación das administracións aconsella a aprobación dunha norma que supera os anteriores estándares e que se concreta nun texto legal que establece esixencias engadidas de transparencia e acceso á información pública. Cuarto. Análise do expediente O Sr solicitou ao Servicio Galego de Saúde, tal e como figura na súa solicitude inicial, no seu escrito de reclamación e no informe do Servicio Galego de Saúde, un certificado do contido dunha información que figurou na web deste organismo, información que o reclamante xa ten no seu poder, e da que remite copia co seu escrito de solicitude. Non existe por tanto unha solicitude de información pública no senso definido no artigo 24 da Lei 1/2016, senón unha solicitude de emisión dun certificado sobre o contido dunha publicación en web que o reclamante xa posúe, polo que ao non ser o obxecto da reclamación a obtención dunha información pública, non procede a admisión da reclamación presentada, por non ser esta Comisión competente, de conformidade co disposto no artigo 24 da Lei 19/2013. En base aos feitos e fundamentos de dereito anteriormente expresados, a Comisión da Transparencia, ACORDA Único: Inadmitir a reclamación presentada por D. , contra a desestimación por silencio administrativo da súa solicitude ao Servicio Galego de Saúde de emisión de certificado sobre o contido da web. Contra esta resolución, que pon fin á vía administrativa, unicamente cabe, en caso de desconformidade, interpoñer recurso contencioso-administrativo, no prazo de dous meses, contados desde o día seguinte á notificación desta resolución, de conformidade co previsto no artigo 8.3 a Lei 29/1998, do 13 de xullo, reguladora da xurisdición contencioso-administrativa. Santiago de Compostela, a 19 de setembro de 2018. A presidenta da Comisión da Transparencia Milagros Otero Parga