Solicitud de expedientes de contratos menores de obra y servicios de conservación eléctrica en Portos de Galicia

ASUNTO: RESOLUCIÓN DA COMISIÓN DA TRANSPARENCIA NA RECLAMACIÓN PRESENTADA AO AMPARO DO ARTIGO 28 DA LEI 1/2016, DO 18 DE XANEIRO, DE TRANSPARENCIA E BO GOBERNO En resposta á reclamación presentada por xxxxxxxxxx, mediante escrito do 12 de xullo do 2016, a Comisión da Transparencia, considerando os Antecedentes e Fundamentos Xurídicos que se especifican a continuación, adopta a seguinte resolución: ANTECEDENTES Primeiro. Xxxxxxxxxx presentou, mediante escrito con entrada no rexistro do Valedor do Pobo o día 12 de xullo de 2016, unha reclamación ao amparo do disposto no artigo 28 da Lei 1/2016, do 18 de xaneiro, de transparencia e bo goberno, por entender desatendida unha solicitude de acceso á información por parte da entidade Portos de Galicia. A persoa interesada indicaba que hai unha desestimación por silencio ante a súa petición dos seguintes datos: “Datos dos expedientes de contratos menores de obra tramitados polo ente público desde 1 de xaneiro de 2014 ata a data. Copia ou acceso aos expedientes para a contratación por lotes dos servizos de conservación, mantemento e mellora das instalacións eléctricas dos portos pertencentes a Portos de Galicia”. O escrito viña acompañado de fotocopia da solicitude dirixida a xxxxxxxxxx, con rexistro de entrada de 8 de abril de 2016, e copia da certificación da vixencia no cargo de xxxxxxxxxx a favor de xxxxxxxxxx emitido polo secretario da demarcación de Galicia do colexio. Segundo. Con data de 1 de setembro de 2016 déuselle traslado da documentación achegada pola persoa interesada a Portos de Galicia para que, en cumprimento da normativa de transparencia, achegase informe e copia completa e ordenada do expediente. A recepción da solicitude pola administración ten data do 7 de setembro de 2016. Terceiro. Con data 6 de outubro de 2016, esta Comisión da Transparencia recibiu o informe de Portos de Galicia e o expediente elaborado. O informe, en resumo, indicaba que o 18 de abril de 2016 tivo entrada na entidade Portos de Galicia unha solicitude de acceso á información pública en relación “a datos dos expedientes de contratos de obra tramitados por esta Entidade Pública desde o 01.01.2014 ata a data, e copia ou acceso ós expedientes para a contratación por lotes do servizo de conservación, mantemento e mellora das instalacións eléctricas dos portos pertencentes a Portos de Galicia”. Dado que se trataba de información sobre expedientes de contratación pública que na súa meirande parte esixían elaboración, Portos de Galicia recoñece que houbo unha demora para achegar a información ao solicitante. Esta circunstancia produciu efectos xurídicos o silencio administrativo negativo. O 8 de xullo de 2016, portos de Galicia recibe unha nova petición do Colegio de Ingenieros de Caminos, Canales y Puertos (datada do 5 de xullo) solicitando a documentación que se indicaba na primeira solicitude, ao tempo que amplía a relación de documentos solicitados inicialmente. Á entidade pública Portos de Galicia no lle constaba a interposición perante o Valedor do Pobo do recurso substitutivo polo que- á vista da solicitude do 5 de xullo- Portos de Galicia resolve conceder o acceso á información a que se refire a solicitude deducida por xxxxxxxxxx, mediante a remisión do documentación e datos solicitada, conforme se indica, o que se acordou na data do 14 de xullo. O informe indica literalmente: “O expediente de licitación e adxudicación da CONTRATACIÓN POR LOTES DOS SERVIZOS DE CONSERVACIÓN, MANTEMENTO E MELLORA DAS INSTALACIÓNS ELÉCTRICAS DOS PORTOS PERTENCENTES A PORTOS DE GALICIA está dispoñible para a súa consulta na Plataforma de Contratos Públios de Galicia no enderezo do procedemento http://www.contratosdegalicia.es/resultado.jsp?N=17216 Sen prexuízo do anterior, no documento PDF: 2016¬¬_Outros expedientes solicitados aparece documentación complementaria sobre este servizo que integra o total da información solicitada sobre tal expediente. En relación ao resto de documentación solicitada se remite a xxxxxxxxxx os seguintes documentos PDF: 2016¬¬_Relación de Contratos Menores; 2014¬_Relación de contratos menores; 2015_Relación de contratos menores”. O informe de Portos ven acompañado do expediente de transparencia nun CD. A resolución da Presidencia de Portos de Galicia do 14 de xullo de 2016 foi notificada e recibida por xxxxxxxxxx, o mesmo día 14 de xullo de 2016. FUNDAMENTOS XURÍDICOS A lexislación aplicable a este procedemento ven configurada pola Ley 19/2013, de 9 de diciembre, de transparencia, acceso a la información pública y buen gobierno, de carácter básico, e a Lei 1/2016, do 18 de xaneiro, de transparencia e bo goberno da Comunidade Autónoma de Galicia, xunto coa lexislación básica en materia de procedemento administrativo á que se remiten as anteriores. Primeiro.- Competencia O artigo 28 da Lei 1/2016, do 18 de xaneiro, de transparencia e bo goberno, establece que, contra toda resolución expresa ou presunta en materia de acceso á información pública, poderá interpoñerse unha reclamación perante o Valedor do Pobo. O artigo 33 da Lei 1/2016, do 18 de xaneiro, de transparencia e bo goberno, indica que corresponde á Comisión da Transparencia a resolución das reclamacións fronte ás resolucións de acceso á información pública que establece o artigo 28 da Lei 1/2016, do 18 de xaneiro, de transparencia e bo goberno. Segundo.- Procedemento aplicable O artigo 28.3 da Lei 1/2016, do 18 de xaneiro, de transparencia e bo goberno preceptúa que o seu procedemento axustarase ao previsto nos números 2, 3, e 4 do artigo 24 da Lei 19/2013, do 9 de decembro, de transparencia, acceso á información pública e bo goberno, para as reclamacións perante o Consejo de Transparencia y Buen Gobierno. A Lei 19/2013, do 9 de decembro, pola súa parte, sinala que estamos ante unha reclamación con carácter potestativo e previo á súa impugnación en vía contencioso-administrativa, e que se axustará na súa tramitación ao disposto na lexislación de procedemento administrativo común en materia de recursos. Terceiro.- Dereito de acceso á información pública  Ámbito material A Lei 1/2016, do 18 de xaneiro recoñece no seu artigo 24 o dereito de todas as persoas a acceder á información pública, entendida, como “os contidos ou documentos, calquera que sexa o seu formato ou soporte, que consten en poder dalgún dos suxeitos incluídos no ámbito de aplicación desta lei e que fosen elaborados ou adquiridos en exercicio das súas funcións”.  Lexitimación O preámbulo da Lei 19/2013, do 9 de decembre, configura o dereito de acceso á información pública de forma ampla, sendo titulares do mesmo todas as persoas. A Lei 1/2016, do 18 de xaneiro, sinala que a persoa solicitante non está obrigada a motivar a súa solicitude de acceso á información, no seu artigo 26.4.  Limitacións que poden afectar ao seu exercicio: A Lei 19/2013, do 9 de decembro, prevé nos artigos 14 e 15 uns límites ao dereito ao acceso, por razón da materia e por mor da protección dos datos de carácter persoal. Todas as solicitudes, que non entren dentro destes límites deberán ser atendidas, agás que existan limitacións e así se xustifiquen debidamente co chamado test de danos, ou algunha das causas de inadmisión do artigo 18 desta lei. • Sobre a ampliación dos prazos para resolver sobre a solicitude de acceso: O artigo 20 da Lei 19/2013, do 9 de decembro, establece que a resolución en que se conceda ou denegue o acceso deberáselle notificar ao solicitante e aos terceiros afectados que así o solicitasen no prazo máximo dun mes desde a recepción da solicitude polo órgano competente para resolver. Este prazo poderase ampliar por outro mes no caso de que o volume ou a complexidade da información que se solicita así o fagan necesario e logo de notificación ao solicitante. O mesmo artigo preceptúa que serán motivadas as resolucións que deneguen o acceso, as que concedan o acceso parcial ou a través dunha modalidade distinta á solicitada e as que permitan o acceso cando houbese oposición dun terceiro. Neste último suposto, indicaráselle expresamente aa persoa interesada que o acceso só terá lugar cando transcorrese o prazo do artigo 22.2 Cuarto.- Análise do expediente Consta que con data de 14 de xullo de 2016 se resolveu conceder o acceso á información e se remitiu a documentación solicitada. É obriga da administración notificarlle a xxxxxxxxxx a necesidade de elaborar a información pública demandada, e proceder a ampliar o prazo conforme o disposto no artigo 20.1 por outro mes, o que se debe ter en conta á hora da tramitación destes expedientes. A lei 19/2015, do 9 de decembro, no seu artigo 20.6 establece que o incumprimento reiterado da obriga de resolver no prazo terá a consideración de infracción grave para os efectos da aplicación aos seus responsables para o réxime disciplinario previsto na correspondente normativa reguladora, polo que esta comisión faille expresa advertencia de que este retraso inicia o control de esta obriga. Quinto. En conclusión Procede recoñecer o dereito a recibir a información por parte dos solicitantes, se ben neste caso, esta, con retraso, xa foi achegada polo que procede o arquivo do expediente. A comisión ten en conta o retraso da resolución nos termos previstos no artigo 20.6 da lei 19/2015, do 9 de decembro. RESOLUCIÓN En atención aos anteriores antecedentes, fundamentos xurídicos e conclusión, procede: Primeiro: Arquivar a reclamación presentada por xxxxxxxxxx como xxxxxxxxxx con data 12 de xullo do 2016, contra a denegación por silencio de Portos de Galicia. Segundo: Non procede darlle copia da información solicitada toda vez que xa lle foi enviada á persoa reclamante con data de 14 de xullo do 2016 por resolución da presidencia da entidade pública Portos de Galicia. Contra a presente resolución, que pon fin á vía administrativa, se poderá interpoñer recurso contencioso-administrativo, de conformidade co previsto na Lei 29/1998, do 13 de xullo, reguladora da Xurisdición Contencioso-Administrativa Santiago de Compostela, 2 de novembro de 2016 A presidenta da Comisión da Transparencia Milagros Otero Parga